நைஜீரியாவில் இனக்கலவரம்: வன்முறைக்கு 300 பேர் பலி

ஆப்ரிக்க நாடான நைஜீரியாவில் கிறிஸ்தவர்களுக்கும், முஸ்லிம்களுக்கும் இடையே நடந்த மோதலில், 300 பேர் கொல்லப்பட்டனர்.

நைஜீரியா நாட்டின் வடக்கு பகுதியில் முஸ்லிம்கள் பெரும்பான்மையாக உள்ளனர். தெற்கு பகுதியில் கிறிஸ்தவர்கள் அதிகம் உள்ளனர்.

தெற்கு பகுதி செழிப்பான விளைநிலங்களை கொண்ட பகுதி. எண்ணெய் வளம் கொண்ட இந்த நாட்டில், முஸ்லிம்கள் பலர் வளமான தெற்கு பகுதிக்கு இடம் பெயர்கின்றனர்.

இந்த விஷயத்தில் கிறிஸ்தவர்களுக்கும், முஸ்லிம்களுக்கும் கடந்த 10 ஆண்டுகளாக பூசல் நிலவி வருகிறது.

கடந்த ஜனவரியில் இது தொடர்பாக வன்முறை மூண்டது. இந்த வன்முறை நேற்று வரை தொடர்கிறது.

கிறிஸ்தவர்கள் அதிகம் வசிக்கும் பிளேட்டியு மாநிலத்தின் சோட், டோகோ-நகாவா கிராமங்களில் நான்கு நாட்களாக தொடர்ந்து இரண்டு பிரிவினருக்கிடையே மோதல் முற்றியுள்ளது.

மலைவாழ் மக்கள் சிலர், கூரிய ஆயுதங்களை கொண்டு தாக்குவதும், எதிர் பிரிவினர் துப்பாக்கியை கொண்டு சுடுவதுமாக இதுவரை 300 பேர் பலியாகியுள்ளனர்.

நைஜீரியாவின் அதிபர் உமரு யார் அடுவா, இதய அறுவை சிகிச்சை முடிந்து மூன்று மாதத்துக்கு பிறகு தற்போது தான் நாடு திரும்பியுள்ளார்.

தற்காலிக அதிபர் ஜொனாதன், மக்களை அமைதி காக்கும் படி கோரியுள்ளார். கலவரம் மூண்ட பகுதிகளில் ஊரடங்கு உத்தரவு அமல்படுத்தப்பட்டுள்ளது.