ஹாடின் சதம்: ஆஸி., வெற்றி

நியூசிலாந்துக்கு எதிரான மூன்றாவது ஒருநாள் போட்டியில், ஹாடினின் அசத்தல் சதம் கைகொடுக்க, ஆஸ்திரேலிய அணி 6 விக்கெட் வித்தியாசத்தில் எளிதாக வெற்றி பெற்றது.

நியூசிலாந்து சென்றுள்ள ஆஸ்திரேலிய அணி, ஐந்து ஒருநாள் போட்டிகள் கொண்ட கிரிக்கெட் தொடரில் பங்கேற்று வருகிறது. முதல் இரண்டு போட்டிகளின் முடிவில், இரு அணிகளும் தலா ஒரு வெற்றி பெற்றிருந்தன. நேற்று மூன்றாவது ஆட்டம், ஹாமில்டனில் நடந்தது. இதில் "டாஸ்" " வென்ற ஆஸ்திரேலிய அணி கேப்டன் பாண்டிங், பீல்டிங் தேர்வு செய்தார்.

டெய்லர் ஆறுதல்:
நியூசிலாந்து அணிக்கு துவக்கம் சரியாக அமையவில்லை. இங்ராம் (5), மெக்கலம் (23), கப்டில் (21) மற்றும் புரூம் (24) என, சீரான இடைவெளியில் அவுட்டாகினர். ஸ்டைரிஸ் (41), ஹாப்கின்ஸ் (45) இருவரும் அரைசத வாய்ப்பை கோட்டைவிட்டனர். மறுமுனையில் ரோஸ் டெய்லர், 62 ரன்கள் அடித்து ஆறுதல் தந்தார். கேப்டன் வெட்டோரி "டக்" " அவுட்டானார். நியூசிலாந்து அணி 46.2 ஓவரில் 245 ரன்களுக்கு ஆல்அவுட்டானது. ஹாரிஸ், ஜான்சன் தலா 3 விக்கெட் வீழ்த்தினர்.

ஹாடின் சதம்:
எட்டிவிடும் இலக்கை விரட்டிய ஆஸ்திரேலிய அணிக்கு வாட்சன் (15) ஏமாற்றம் அளித்தார். பின் ஹாடின், பாண்டிங் இணைந்து அசத்தல் ஆட்டத்தை வெளிப்படுத்தினர். இரண்டாவது விக்கெட்டுக்கு 151 ரன்கள் எடுத்த நிலையில் பாண்டிங் (69) வெளியேறினார். ஹசி (9) நிலைக்கவில்லை. தன்பங்கிற்கு சிறப்பான ஆட்டத்தை தொடர்ந்த ஹாடின், சர்வதேச அரங்கில் தனது இரண்டாவது சதத்தை (110) அடித்தார்.

ஆஸ்திரேலிய அணி 47.2 ஓவரில் 4 விக்கெட்டுக்கு 248 ரன்கள் எடுத்து எளிதான வெற்றி பெற்றது. ஒயிட் (25), வோஜஸ் (13) ஆட்டமிழக்காமல் இருந்தனர். இதையடுத்து ஒருநாள் தொடரில் 2-1 என, ஆஸ்திரேலிய அணி முன்னிலையில் உள்ளது.